MINEDUC: Hanyerejwe isima ya 100.000.000 frw zirenga

Hakunze kuvugwa inyerezwa ry’umutungo wa Leta mu nzego zitandukanye ugasanga abantu bibaza amaherezo yabyo. Mu bihe bishize byarasakuje, cyane cyane ubwo Umugenzuzi w’Imari ya Leta « Auditeur Général » yashyiraga hanze raporo y’igenzura ku mikoreshereze y’amafaranga mu nzego zitandukanye. Icyagaragaye ni uko amafaranga ya Leta anyerezwa ku buryo bugaragara muri za Ministeri cyangwa bishamikiye kuri Leta.
Ikigaragara ni uko abantu baheruka raporo itangazwa, hakagaragazwa n’abagize uruhare mu kunyereza ayo mafaranga, ariko kugeza ubu ikurikiranwa ry’abo bose banyereje ntacyo rivugwaho ku buryo dosiye ubu yasinziriye.
Aha rero niho abantu bahera bavuga ko Leta ishyira imbaraga mu gushaka amafaranga kenshi igakamura n’abaturage kugirango ibavanemo imisoro, ariko umutungo ubaturutsemo ukigira mu mifuka ya bamwe kandi bikarangirira aho. Niyo mpamvu rubanda ikijujuta ivuga ko umuco wo kudahana ucyicaye ku ntebe mu Rwanda.
IMIFUKA 10.000 YA SIMA YABURIWE IRENGERO
Muri Gereza Nkuru ya Kigali hafungiye abagabo babiri aribo Mugisha Delphin na Gahutu Fidèle bazira kunyereza isima yari igenewe Uturere muri gahunda yo kongera ibyumba by’amashuri.
Nkuko byemejwe n’Urukiko Rwisumbuye rwa Nyarugenge, aba bagabo bombi rukaba rwarabahamije icyaha cyo kunyereza umutungo wa Leta, bityo rubakatira igifungo cy’imyaka itanu bombi ; nkuko bigaragara muri dosiye y’urubanza rwabo rwaciwe ku ya 29/07/2011.
BIMAZE IGIHE
Nk’uko bigaragara muri dosiye iri nyereza ryatangiye mu mwaka ushize wa 2010, umuntu akaba yakwibaza impamvu hari hashize umwaka wose abo bireba batarabimenya. Bisobanura ko hari abayobozi basinziriye mu nzego zitandukanye batamenya inshingano zabo, bibera mu bindi ku buryo kugenzura ibyo bashinzwe ntacyo bibabwira.
Ku rundi ruhande nk’uko nanone bigaragara muri iyi dosiye, hakaba hari bamwe mu bayobozi cyangwa abakozi batekinika nk’uko Perezida Kagame aherutse kubigarukaho ubwo yasozaga ku mugaragaro amasomo y’abayobozi b’Imirenge, ariko byamenyekana abo bayobozi bagatanguranwa ndetse bakaba n’aba mbere mu kugaragaza ko ari bo batahuye amanyanga.
Aha ngaha inzego bireba zikwiye kuhatekereza cyane, kubona Umuyobozi amenya ko habaye inyerezwa ari uko byasakuje kandi iryo nyereza ryakozwe mu byo ashinzwe gucunga ni ikibazo.
Iriya sima rero mu by’ukuri ikaba yaratangiye kwibwa muri Kanama 2010, aho yavanwaga muri stock ya Ministeri y’Uburezi iri ku Kicukiro, ijyanwa mu Turere dutandukanye.
Gahutu Fidèle akaba afite sosiyete y’ubwikorezi yitwa ATM, naho Mugisha Delphin ngo akaba yari ahsinzwe gucunga stock cyangwa Magasinier. Tukimara kumenya iki kibazo twagerageje kugikurikirana, dusanga ari dosiye ndende kandi bigaragara ko abagize uruhare mw’inyerezwa ry’iyi sima nabo bashobora kuba benshi kandi birumvikana kuko, kuva kuri Cimerwa mu Bugarama kugera i Kigali, no kuva i Kigali ujya mu Turere dutandukanye ni inzira ndende.
Si i Kigali gusa kandi kuko nk’uko bitangazwa n’abo bireba muri Ministeri no mu Ntara y’Iburasirazuba ndetse n’Iburengerazuba, icyo kibazo cyarabaye. Byabaye ngombwa rero ko twiha igihe gihagije cyo gucukumbura ngo tumenye ukuri kose, kuko twasanze harimo ibidasobanutse.
Bimwe muri byo ni uruhare abaregwa bashinja Umunyamabanga wa Leta muri Mineduc Bwana Harebamungu Mathias n’Umuyobozi ukuriye ishami ry’ubwubatsi bw’amashuri muri Ministeri Bwana Habimana Warren, nk’uko bigaragara muri dosiye y’urubanza.
Ibindi bidasobanutse muri iyi dosiye ni nko kuba abacuruzi bivugwa ko bagize uruhare mw’inyerezwa ry’iyi sima ngo barafatwaga nyuma bakemera kwishyura, bityo inzego za Police cyangwa Ubushinjacyaha zikabarekura mu gihe amategeko ateganya ko ubwinjiracyaha buhanirwa « TOUTE TENTATIVE EST PUNISSABLE ».
BARABIHAKANA
Twabajije Bwana Habimana Warren icyo abivugaho, atubwira ko ibyo Gahutu Fidèle na Mugisha bavuga nta kuri kurimo ari amatakirangoyi y’umuntu watawe muri yombi, mu gihe bariya bagabo bo bemeza koko ko sima bayigurishaga ariko babiziranyeho n’uyu Warren ngo ariwe wabaga yabivuganyeho na Magasinier Mugisha Delphin.
Ministre Harebamungu Mathias nawe twaramubajije, adusubiza bimwe n’ibya Warren. Kuri telefoni ye akaba yaraduhaye ibisobanuro bitandukanye kandi birebire, ariko agashimangira ko Gahutu afatwa yari amaze igihe bamugendaho, kuko bijya kumenyekana ngo byaturutse ku kubura kw’isima yagombaga gukoreshwa mu bwubatsi bw’ishuri rya étage mu Karere ka Gasabo.
Ministre Harebamungu yemera ko habaye uburangare bwo kugenzura uko kiriya gikorwa cyagombaga kugenda. Avuga ko habaye akazi gakomeye ngo Gahutu afatwe ari nayo mpamvu ashimira cyane Police yabigizemo uruhare kugirango hatahurwe byinshi. Uko biri kose mw’icibwa ry’urubanza rwa bariya bagabo, Urukiko rwavuze ko « HARI ABAYOBOZI BAMWE NA BAMWE BO MURI MINEDUC BASHOBORA KUBA BARAGIZE URUHARE MW’INYEREZWA RY’IBIKORESHO BIVUGWA MURI RURIYA RUBANZA, ARIKO BAKABA BATARAKURIKIRANYWE KU MPAMVU ZITAZWI KUGEZA UBU. URUHARE RW’ABO BAYOBOZI RUKABA RUGARAGARIRA CYANE MU KUBA HARI IBIKORESHO BYANYEREZWAGA NTIBIGERE IYO BYAGENEWE KUJYANWA, NYAMARA ARIKO ABASHINZWE KUBIGENZURA BAKABIRENZAHO BAGATANGA RAPORO NZIMA YUZUYE, NDETSE NA ATM TRANSPORTER IGAHEMBWA AMAFARANGA YAYO YOSE NTA KIBAZO ».
Ibi bivugwa n’Urukiko rero nayo ni indi mpamvu ituma tuvuga ko iki kibazo tugomba kugikurikirana neza kuko gisaba iperereza rihagije, bityo tukazatangaza dosiye yuzuye, tunagaragaza ababigizemo uruhare bose.

Niyonambaza Assumani

Ubutegetsi busangiwe bute mu Rwanda

Icyo FPR yise Kugabana (gusangira )ubutegetsi ni iki ?

Ubwo FPR yafataga ubutegetsi, imaze gutsinda ingabo zahoze ari iza FAR(Forces Armée Rwandaise), yashyizeho Leta ihuriweho n’amashyaka atari yagaragaye mu bikorwa byo gutegura no gushyira jenoside mu bikorwa.Amashyaka MRND na CDR yahise aseswa.Icyo gihe, hari tariki ya 19 Nyakanga 1994, hajyaho Leta ihuriweho n’amashyaka menshi, FPR iyizeza ko bazasangira ubutegetsi!!

Mu mwaka wa 2003, ubwo inzibacyuho yasozwaga n’amatora yakozwe ku mugaragaro, na none FPR yongeye kwizeza amashyaka bafatanyije ko itaziharira ubutegetsi, ko hazabaho isaranganywa.Ubwo amashyaka amwe ahabwa imyanya muri guverinoma, ndetse no mu nteko ishinga amategeko imitwe yombi.

Mu matora aherutse ya 2010, FPR n’umukandida wayo Paul Kagame, batsinze amatora, na none bavugako bazasaranganya n’abo bari bamaze gutsinda, aribo PSD na PL. guverinoma yashyizweho urebye abenshi bagumye mu myanya yabo, icyo bise ko ikipe itsinda idasimburwa, urebye ibintu byagumye uko byari bimeze ndavuga inzego za Leta.

Nyamara kugeza kuri uyu munsi, hari abantu benshi bibaza icyo FPR yashatse kuvuga ngo gusangira ubutegetsi cyangwa gusaranganya ubutegetsi, mbese mu yandi magambo ni ukugabana ubutegetsi n’andi mashyaka!Ese imyanya igabanwa cyangwa isaranganywa ni iyihe ?Aha ngira ngo niho hari ikibazo, turaza kubaza amwe mu mashyaka icyo babivugaho dusoza iri sesengura.

Imyanya yitwa ko yasaranganyijwe ni iy’abaminisitiri, igenwa ku bubasha Perezida wa Repubulika ahabwa n’itegeko, ariko na none itegeko riteganya ko ishyaka ryatsinze amatora ritagomba kurenza 50 ku ijana by’imyanya muri guverinoma, ni ko bimeze ? Ku badepite n’abasenateri hakurikijwe amajwi amashyaka yabonye.

Indi myanya usanga ari itako rya FPR, abandi ntibagire icyo babaza!None rero si ugusaranganya ni ukugabirwa! Abo baragabiwe, isaha ni isaha bashobora kunyagwa!

Imyanya ntabwo ari ubuminisitiri, senateri,cyangwa depite, ibindi ngo nikubire!None se guverineri w’Intara si umwanya ukomeye! Cyakora harimo umwe wa PSD ariwe Kabahizi Celestin, uyobora intara y’iburengerazuba. Za komisiyo, ubu mu Rwanda hari za komisiyo ziteganywa n’amategeko nyinshi, ba Perezida bazo, abakomiseri bazo, utari muri FPR ubwo habayeho kwibeshya.Za ambasade u Rwanda rufite n’abakozi bazo, utari umuyoboke wa FPR, ubwo yarasaranganyijwe!

Ba Executifs b’Intara, Uturere, Imirenge, Utugari n’abakuru ba za njyanama, ni FPR nsansa, mu kubatora baravugaga ngo kanaka niwe umuryango ushyigikiye.Sinigeze numva ngo uriya niwe PL cyangwa PSD ishaka.

Ririya tangazo ryo kuwa 19/Nyakanga 1994, FPR ikwiye kongera ikarisobanura abatari abayoboke bayo doreko bagiye bacika intege, bakaba politike baragiye bayihunga kuko babonaga ntacyo bibamariye, icyitwa gusangira kigasobanuka, kuko n’igihe inzibacyuho yasozwaga mu ma discours menshi byaravuzwe ko hatazabaho kwiharira !

Kwiharira biganisha habi kuko icyo gihe bisa nk’aho abantu baba basubiye mu ishyaka rimwe kandi iyo urebye uko amashyaka atari ku butegetsi ameze ntashiti ko FPR ariyo yonyine mu kibuga kandi ishyaka rimwe rukumbi aho ryagejeje isi ntawe utahazi, kuba mu ishyaka rimwe ni nko gutera ukiyikiriza cyangwa ukikirigita ugaseka!

Ibitekerezo binyuranye nibyo byubaka igihugu, kandi uretse no gusangira n’abandi utihariye, FPR ikwiye no kujya ihindura abantu ( individus ).

Muri FPR, usibye ko biri no muri amwe mu mashyaka, yenda byabaye umwera uturutse ibukuru, usanga abantu bamwe bahora mu myanya badahinduka.

Muri 1994, umuntu yari depite kugeza uyu munsi , undi ni Minisitiri, iyo atari Minisitiri ni ambasaderi cyangwa arategeka komisiyo cyangwa ni senateri.Hakenewe ibitekerezo bishya!

Burya kubakurikiranira hafi ibya politike bemeza ko abantu nk’abo, badahinduka, bashaje muri politiki, ari kimwe mu byashenye Uburusiya! Aho abasaza bari kumwe na Gorbachevu, isi yabasize, ibintu bibacikiraho, igihugu kirasenyuka burundu !Icyo bitaga gerontocratie, simvuze ko ari abasaza ariko ibitekerezo sinzi niba ari bishya.Gusangira bimwe, ukagundira ibindi si umuco mushya.

Ikinyamakuru cyagerageje kubaza abayobozi b’amashyaka PSD,PL na PDC, abo twashoboye guhamagara tubaza, niba bishimiye imyanya bahawe, bahitaga bavuga ko twabaza abakuru b’amashyaka ( Hon Byabarumwanzi wa PL yanze kudusubiza, abihirikira Mitari tutabashije kubona kuri telefone ).

Nk’abanyamakuru twagerageje kubaza abandi bari muri PL, babwiye Impamo ko PL ifite abaminisitiri 2, abadepite 4 bari ku rutonde, abasenateri 2, komiseri 1, ba visi Meya 2 na Meya 1.Kuri PL ngo babona barasaranganyijwe neza ukurikije uko bahagaze.

PDC yatangarije Impamo ko ntaminisitiri ifite, igira senateri 1, umudepite 1, komiseri 1, visi Meya 1, ahandi ntabayoboke bahafite.Ku bwa PDC ngo politike ni ugushaka imyanya myinshi ishoboka mu buyobozi kugirango ibitekerezo byabo bitambuke, kuba bafite iriya myanya ngo ni intambwe, ariko babonye indi ntiyabagwa nabi.Ku myanya yindi cyane iy’inzego z’ibanze ngo ntibiborohera kuyigeraho kuko batarakorera hasi cyane.

PSD mu bisubizo Impamo yabonye ni uko bafite abaminisitiri 2, abasenateri 2 harimo n’umukuru wa sena ucyuye igihe, abadepite 7 bari kurutonde, ba komiseri 2, Guverineri w’Intara 1, Meya 1, ba Visi Maya 4, nyjanama a’Akarere 1, ambasade: umukozi wo hejuru umwe( news york ),Executif wa komisiyo y’ubumwe n’ubwiyunge, ba Executif b’uturere , imirenge, utugari: 0.Ibigo bya Leta:0

Ku bwa PSD iyi myanya si mike ariko intego ni ukubona iyisumbuye, kuko buri mutwe wa politike niyo ntego yawo.

Ku kibazo cy’uko FPR yabasaranganyije neza kugera kunzego zo hasi no mu bigo bya Leta, wasangaga aya mashyaka yose twabajije barahigimaga, kandi uhigimye mu kinyarwanda aba avuze, bahitaga bagusubiza ko ntacyo babivugaho, bivuze ko muri izi nzego baryamiwe bikomeye.

Mwitende Jean Claude

Depite Ashinzwuwera yirukanywe mu nteko!

Nyuma y’igihe kitari gito agerageza kujijisha ari nako yihagararagaho kandi yararenzwe n’amahano ashingiye ku myitwarire ye mibi, uwari depite Ashinzwuwera Alexandre yirukanywe mu Nteko Ishinga Amategeko nk’uko byatangajwe na Visi Perezida w’Inteko Honorable Polisi Denys, kuwa mbere tariki 18/07/2011.

Ashinzwuwera akaba yirukanywe mu Nteko Ishinga Amategeko azira kwitwara nabi „Indiscipline” kuko amaze igihe agigagurana n’inzego z’ubutabera niz’ubushinjacyaha aho zimukurikiranyeho icyaha cyo gukubita no gukomeretsa bikomeye murumuna we Hagenimana Eric.

Nk’uko twagiye tubitangaza muri RUGARI, nyuma y’aho bimenyekaniye ko Ashinzwuwera yishe urubozo murumuna we kandi akaba yari asanzwe abikora kenshi, final ikaza kuba igihe yamukubitaga byo kumukomeretsa amuziza amafaranga 1000 ngo kuko yamutumye umuriro akibeshya akazana uwa 2000 kandi yagombaga kugarurira Depite, yatawe muri yombi baramufunga.

Umwe muri ba bacamanza dusigaranye rero wamuburanishije, yaje kumurekura by’agateganyo ngo ajye aburana ari hanze. Abakurikiranye uru rubanza bakumva n’ibyo uyu murwanyi w’Umudepite ashinjwa, kimwe n’ababonye uko yagize murumuna we wari ufite ibisebe umubiri wose kubera urusinga rw’amashanyarazi yahoraga amukubita, bakubiswe n’inkuba bumvise ko umucamanza amurekuye. Cyakora muri bwa bwigenge ubu benshi bise „GUTEKINIKA” bamwe mu bacamanza bakoreramo; birumvikana ko kuba yaramurekuye byashobokaga. Gusa ntibyaciriye aho kuko ubushinjacyaha bwagaragazaga ibimenyetso bifatika ku cyaha cya Ashinzwuwera bwahise bujuririra icyo cyemezo cyo gufungura Ashinzwuwera, kandi Urukiko Rukuru rwakiriye ubwo bujurire rwabuhaye agaciro kuko rwasanze bufite ishingiro.

Rushingiye ku itegeko, Urukiko Rukuru rwahamagaye Depite ngo aburane yanga kwitaba, rwongera kumuhamagaza bwa kabiri nabwo ntiyitaba. Nta kindi rero cyagombaga gukorwa mu rwego rw’amategeko uretse kuruca adahari, bityo rwemeza ko Depite Ashinzwuwera aburana afunze, runategeka ko ahita atabwa muri yombi.

Yabaye nyamwongerabibi

Icyemezo cy’Urukiko Rukuru cyashyikirijwe Police yagombaga kumufata, abapolisi bageze iwe, Depite Ashinzwuwera noneho akora agashya kuko yahise atangiza intambara yo kurwanya abapolisi, ndetse agategeka abo bari kumwe mu rugo kuvugiriza induru abapolisi no guhuruza abahisi n’abagenzi ngo bamufashe kurwanya abapolisi.

Muri uko kurwanya abapolisi kandi niho Depite Ashinzwuwera yakomerekeje Komanda wa Station ya Police i Nyamirambo kuko yamwadukiriye akamukubita amenyo hagati y’igituza n’urutugu rw’iburyo, uyu Komanda akamara ibyumweru hafi bitatu yipfukisha. Iki kikaba ari icyaha gikomeye kandi giteganywa kikanahanishwa ingingo ya 235 y’igitabo cya II cy’amategeko ahana ibyaha mu Rwanda, ivuga ko: „UZAKUBITA ABARINZI B’AMAHORO BARI MU KAZI KABO AZAHANISHWA IGIFUNGO CY’AMEZI 6 KUGEZA KU MYAKA ITATU”.

N’ubwo yarwanyije abarinzi b’amahoro ariko, nta kundi byagombaga kugenda bo bashyize mu bikorwa icyemezo cy’Urukiko, Depite Ashinzwuwera arafatwa afungirwa muri Gereza Nkuru ya Kigali.

Hagati aho niko Inteko Ishinga Amategeko muri rusange, na Komisiyo yayo igenzura imyitwarire y’abadepite „Commission de Discipline” bakurikiranga by’umwihariko amakuru ya Ashinzwuwera, ari nako bakora iperereza.

Baje gusanga rero imyitwarire n’amateka bye mu by’ukuri bitamuha uburenganzira bwo kuguma ku rutonde rw’abadepite ba Leta y’u Rwanda muri rusange, nurw’abadepite ba RPF, by’umwihariko, dore ko uriya murwanyi ngo yari yagiye ku rutonde rwa RPF n’andi mashyaka yifatanyije nayo harimo na PSP yayoborwaga na Safari Stanley wahamijwe ibyaha bya Génocide agahita atoroka, kugeza ubu akaba ashakishwa na Police Mpuzamahanga Interpol.

Twakwibutsa ko Safari Stanley wari Senateri yahamijwe ibyaha bya Génocide yakoreye aho akomoka i Cyarwa mu Karere ka Huye i Butare, agakatirwa igifungo cya burundu n’Inteko y’Urukiko Gacaca rwa Kimironko yari imaze icyumweru cyose i Butare ihaburanishiriza imanza zari zarananiranye cyane cyane urwa Safari wari warakoze ibishoboka ngo asisibiranye ibyo yaregwaga.

Ni naho kandi benshi bahera bavuga bati: „UBUNDI NI NDE WATURUKA KURI SAFARI NGO ABE MUZIMA” dore ko uyu Ashinzwuwera yari yagiye ku rutonde rw’abadepite ari Safari umutanze. Hagati aho amakuru atugeraho akavuga ko Ashinzwuwera yirukanywe mu Nteko yari amaze iminsi afunguwe by’agateganyo bwa kabiri, cyakora ngo ashobora kujuririra kiriya cyemezo cyo kumwirukana mu Nteko da!!

RPF niyikubite agashyi

Ishyaka cyangwa Umuryango RPF, igihe cyaba kigeze niba kitararenze ngo yikebuke, irenge bya bindi tujya twumva ngo by’inyungu za Politiki bituma yugururira abantu badafite ibyangombwa byuzuye byo kwinjira mu rugo rwayo. Aho u Rwanda rugeze, RPF nimenye ko hakomeye, bityo yumve ko uwari we wese waba agishaka kugumana indangamuntu yo „KURWAZA” atagikenewe muri iki gihugu. Amateka, imikorere n’imyitwarire bya RPF birazwi, ntibiwkiye ko uyu munsi byumvikana ko igifite cyangwa yitirirwa abantu nka Ashinzwuwera. RPF nk’uko bivugwa kandi nibyo, niyo moteri iyobora u Rwanda. Moteri rero n’iyo hagiyemo akabuye kangana n’ijisho ry’ikaramu irangirika bya bindi bavuga ngo imodoka yagonze moteri.

Twibutse abantu nka Ashinzwuwera muri RPF bakirimo n’ubwo bataratamburika, nyamara yaba RPF cyangwa abo ba nyirubwite, bakwiye kumenya ko rubanda ibazi. Niba atari ibicuma babaca, ahubwo ni ibanga babagirira kugirango bisubireho.

Ubwo bimaze kugaragara ko hari abo byananiye rero, isaha ni isaha bagashyirwa hanze kugirango badakomeza kwitambika mu muhanda bigatuma igihugu gikererwa mu rugendo rugana aheza hacyo. Turanze!! Turanze abantu nka Ashinzwuwera bagomba kuva mu nzira kuko kumva Umudepite warwanye, wakubise agakomeretsa iyo ni scandale!!!

Hari abandi bagenzi be nabo tumaze iminsi twakira amakuru y’imyitwarire yabo idahwitse nko guhora mu nkiko baburana n’abo bambuye „AMAHUGU”, abahora muri Police babazwa ku manyanga atandukanye bakora cyane cyane muri za business zidasobanutse nko kugura amazu y’abari hanze y’igihugu kandi bafite ibyo bakurikiranyweho n’ibindi...

Aba bose nabo ubwabo bazi ko tubazi, icyo ubu dukora akaba ari ukwegeranya ibimenyetso hato batazavuga ko twababeshyeye dore ko ubu ngo bavumbuye indi turufu yo kwirukankira muri Police cyangwa mu Nama Nkuru y’Itangazamakuru, ngo babasebeje! Se ariko ubundi bagiye banyomoza ku mugaragaro ibyo baba bavuzweho, niba koko baba bumva babasebeje? „NTA MUNTU USHOBORA KUBAHA AGACIRO NIMWE MUKIHA”.

Assumani Niyonambaza

Bombori bombori hagati y’Umujyi wa Kigali n’ibigo by’ubwishingizi

Umujyi wa Kigali hashize igihe warafashe gahunda yo gufata imodoka angije akarere nyaburanga aha nkuko itegeko ngenga no 04/2005 ryo ku wa 08/04/2005 rigena uburyo bwo kurengera, kubungabunga no guteza imbere ibidukikije mu Rwanda ribivuga iryo tegeko mu ngingo yaryo ya 97 ivuga ko ahanishwa ihazabu kuva kuri miliyoni imwe y’amafaranga y’u Rwanda kugeza kuri miliyoni eshanu n’igifungo kuva ku mezi 6 kugeza ku myaka 2 cyangwa se kimwe muri ibyo bihano umuntu usenya inyubako irinzwe cyangwa wangiza akarere nyaburanga iyo ngingo niyo yabaye ipfundo ry’iyo bombori mbori tuvuga aho umujyi wa Kigali uyishingiraho ufatira imodoka ziba zangije akarere nyaburanga akenshi zikagonga imikindo buri mukindo uwawugonze akaba yishyura umujyi wa Kigali miliyoni imwe kugirango ahabwe imodoka ye ibyo bikaba bihabanye n’imikorere y’ibigo by’ubwishingizi biba byarishingiye ibinyabiziga ubwishingizi bw’ uburyozwe ni ukuvuga ko byo biriha ibyangijwe n’imodoka ibyo bigo biba bibereye umwishingizi bisobanura neza ko nta mpamvu yo kuba umujyi wa Kigali wishyuza nyiri imodoka kandi yarafatiye imodoka ye ubwishingizi, icyo gihe ubwo bwishingizi yabibonamo ko ntacyo bumumariye . ikindi giteye urujijo kikanerekana neza ko iyo ngingo ibangamiye ibigo by’ubwishingizi ni uburyo iyo umujyi wa Kigali umaze kwishyurwa ya miliyoni uhindukira ukandikira ikigo cy’ubwishingizi nyir’ukwangiza ha hantu nyaburanga afitemo ubwishingizi bw’imodoka ye ibaruwa imusabira kuba yakwishyurwa kuko nawe yishyuye umujyi wa Kigali ibyo bikaba ari ukuvangira ibigo by’ubwishingizi no kubitesha icyizere biba bisanzwe bifitiwe n’abakiriya babyo. Ubusanzwe usaba kwishyurwa ni uwangirijwe n’ikinyabiziga umujyi wa Kigali nawo ukaba ari uko wakabigenje ukishyuza ikigo cy’ubwishingizi nyir’ukwangiza akarere nyaburanga afatiramo ubwishingizi aho kwishyuza nyir ’ikinyabiziga. Ikindi gitera kwibazaho ni ubwishyu bw’umukindo uba wangijwe aho umujyi wa Kigali wita ubwo bwishyu ko atari amande ahubwo ari ubwo gusubizaho ibyangijwe, igiteye kwibazaho ariko ni n’uburyo nkuko byerekanwa na kopi yerekana neza ibijyanye n’ibiciro umujyi wa Kigali uheraho wishyuza umukindo aho uvuga ko agaciro k’umukindo uba wangijwe kangana na miliyoni imwe hagamijwe gusa guhuza ayo mafaranga n’ari mu itegeko ngenga rirengera ibidukikije kuko bavuga mu ngingo twavuze haruguru ko uwangije ibiri ahantu nyaburanga ahanishwa kuva kuri miliyoni imwe kugera kuri eshanu n’ibindi bihano nko kuba yafungwa .Ubusanzwe ngo uwo mukindo nkuko iyo kopi ibyerekana neza ugurwa ku gaciro k’ibihumbi icumi by’amafaranga y’uRwanda,ariko bakavuga ko hiyongeraho ajyanye no kuwitaho buri kwezi ukaba utwara umukindo umwe 141.428 mu myaka 7 akaba angana na 990.000 Frw yose hamwe akaba angana na 1.000.000 Frw uwashingira kuri icyo giciro asanga mu byukuri ayo mafaranga n’ubwo uburyo umujyi wa Kigali uyishyuzamo bucuramye , aba akwiriye umukindo umaze imyaka 7 ariko igitangaje kubera gushaka ifaranga hatitawe ku burenganzira bw’umuntu n’imikorere y’ibigo by’ubwishingizi umujyi wa Kigali iyo miliyoni uyica no ku mukindo waraye utewe upfa gusa kuba ari umukindo utewe ahantu nyaburanga . Byumvikane neza ko tutagamije gushyigikira abangiza ibikorwa biri ahantu nyaburanga kuko aho hantu uretse no guha isura nziza umujyi wa Kigali hanahesha isura nziza igihugu mu rwego mpuzamahanga cyane ko abashyitsi bose basura uRwanda bagenda bashima uko basanze Kigali isa ibyo bigatuma benshi bitabira kuza kureba umujyi w’igihugu kivuye mu gihe gito mu ntambara na jenoside yakorewe abatutsi ibyo ni ibyo kwishimira no kwitabwaho igihe cyose .Ariko ibyo ntibivuga ko kubungabunga ibyo bikorwa bigomba gukorwa mu buryo bunyuranyije n’amategeko nabyo sibyo kuko ayo mategeko agena uburyo bwo kurengera, kubungabunga no guteza imbere ibidukikije mu Rwanda agomba kubaho atabangamira andi mategeko kuko nkuko bigaragara iryo tegeko ngenga twavuze haruguru uburyo umujyi wa Kigali urikoresha bibangamira cyane imikorere y’ibigo by’ubwishingizi bikorera mu Rwanda . Ibyo rero biteza igihombo ibyo bigo by’ubwishingizi kuko bituma abo byishingira babitera icyizere kuko batiyumvisha uburyo bafatira ubwishingizi bw’uburyozwe ibinyabiziga byabo hanyuma bakarenga bakishyuzwa akayabo n’umujyi wa Kigali, icyo gihe birumvikana ko imiterere y’ubwo bwishingizi buba

bugenewe kubagoboka igihe cyose bagize ibyo bangiza bari mu binyabiziga iba ibangamiwe mu buryo bukomeye .Ni byiza rwose kurengera ibidukikije ariko bikwiye gukorwa mu buryo urwego uru n’uru rutabangamira imikorere y’izindin nzego kuko umuntu yanakwibaza ikibazo iyo imodoka igonze umuntu

mu byukuri umuntu niwe uri ku isonga ry’ibidukikije yapfa, yamugara iyo mpanuka muri iyo mpanuka umuntu akurikiranwa mu buryo busanzwe bukoreshwa, hakazishyurwa indishyi ijyanye n’ibyo amategeko agenga ibigo by’ubwishingizi ateganya iyo bitanyuze abishyuwe indishyi icyo gihe bashobora no kwitabaza inkiko ariko ku mukindo ho ntazindi mpaka uwugonze agomba kwishyura miliyoni yanze akunze kugirango abashe gusubizwa imodoka ye umujyi wa Kigali uba wafunze aha akaba ariho nshingira mvuga ko umujyi wa Kigali uha agaciro ibidukikije kurusha ikiremwamuntu cyo kiri ku isonga ya byose. Akaba ariyo mpamvu dusanga umujyi wa Kigali ukwiye gushishoza neza kuri i cyo cyemezo wafashe kuko bigaragara ko kibangamiye imikorere y’ibigo by’ubwishingizi, bitari ibyo byaba bibangamiye ya vision 2020 twese twifuza kugeramo duteye imbere.

Gatete Jean Bosco

Intambara iratogota muri FPR

Mu minsi irimbere hafi mu kwezi k’Ukwakira hateganyijwe amatora y’abasenateri, bagomba gusimbura abandi. Bikaba bivugwa ko biteganyijwe mu mategeko ko nta musenateri usubira muri uwo mwanya.

Bamwe mu bakurikirana politiki y’u Rwanda bakibaza aho bariya basenateri bazerekeza ! n’ubwo ngo bamwe bagiyeho batanzwe n’amashyaka yabo, abandi Forum y’amashyaka hariabandi bashyizweho na Nyakubahwa Paul Kagame.Ariko bikavugwa ko aba ari amacenga ya politikin ngo benshi baba bagiyeho ku itike y’umuryango F.P.R. Dukur iki je bimwe mu bivugwa n’ abantu ngo abasenateri bagera hafi 24. hakaba 2 batanzwe naKaminuza z’u Rwanda.

Byumvikane ko Prof. Barinda Rwigamba yagiyeho ahagarariye za Kaminuza zigenga haho Dr. NIZURUGERO atangwa na Kaminuza ya Leta. Icyo gihe Senateri Iyamuremyena Nyiramiruho batangwa na Forum y’amashyaka Ba senateri Higiro Prosper yatanzwe n’Ishyaka rya PL ; Dr. Vincent Biruta atangwa na P.S.D naho Agnès Mukabaranga ava muri P.D.C.

Hanyuma ba Senateri Nzirasanaho, Nshunguyinka, Mugesera Antoine , Gasamagera, Munyabagisha, Munyakabera, Kayijire Agnès, Mariya Mukantabana, Ayinkamiye, KubwimanaChrisologuena Jean Baptiste uvuka Byumba wahoze ari Burugumestre wa Giti babaye abasenateri batowe n’abaturage, bitewe na prefegitura bavukagamo icyo gihe. Naho ba senateri Safari Stanley; Alvera Mukabaramba, Inyumba Aloysia ; Karemera ; Kamanzi Seth na Nakwigendera Eliya Mpayimana bashyizweho na Nyakubahwa Paul Kagame.Bikavugwa ko aba (6) banyuma ari bo basigaramo nabo bakamaramo imyaka 2 gusa, abandi bose bagosohoka mu biro batarora inyuma.

Bamwe mu bavuga ibyo bakaba ariho bahera bibaza aho bazerekeza kuko manda yabo y’imyaka 8 irangiye. Byumvikane ko abatarabashije kwizigamira bazahura na Ruzagayura naho abitereye igiti cyera amafaranga nka Barinda wihingiye igiti cy’umugisha c y i twa U.L.K. ari ku idembe, hakaba hababaje ibya Nizurugero niba nawe azisubirira kwigisha.Bivugwa ko muri bariya 6 bazasigaramo hasigaye mo 4. Naho 20 bazasimburwa. Aha akaba ariho hagiyekubera ihurizo ababahaye imyanya. Ese bariya 20 bazasimburwa na bande ?Abandi bazerekeza he ? Uhanzwe amaso nta wundi ni F.P.R. ! Dore ahari ibibazo : ahambere, ni muri bariya ba senateri 2 batanzwe na Forum y’amashyaka. Muri iki gihe mu Rwanda harabarurwa hafi amashyaka akabakaba 12. kandi nta shyaka rijyaho ridashaka ubuyobozi no guhagararirwa. None ubwo P.S.D na P.L. bizongera bibone imbehe muri sena kandi hari andi mashyaka arekereje ! Kandingo ijwi ry’ishyaka ringana n’irindi, byumvikane ko ijwi ry’Imberakuri riba ringana n’irya PSD.

Ikindi kibazo kizavuka mu gutoranya abasenateri bahagarariye za Kaminuza. Hano bivugwa ko byakemutse kuko ngo Kaminuza zigenga zumvikanye kuzatora Prof. Nkusi Laurent uzaba aturutsemuri UNATEK-Kibungo. Ndetse ngo n’ishyaka P.L ryamukoreye lombing kugira ngo atazaza kwiyamamariza mu ishyaka bigatera ikibazo dore ko n’ubushize bari bamwimye n’ubudepite.

Ubwo haba hasigaye uzava muri za Kaminuza za Leta, uretse ko bavuga Karangwa Chrisologue. Intabara rero iracucumba mu bazasimbura Higiro Posper muri P.L dore ko bihwihwiswa ko uzamusimbura yazaba na Visi-Perezida wa Sena. Bavuga ko Minisitiri Mitari awushaka ariko bigatuma arakarira cyane Mukabarisa Donatilla na SIMBURUDARI Théodore nabo babifitiye inyota. Iyi ntambara uzayikiza ntawe uramemyekana dore ko bivugwa ko Mitari yemeza ko ibukuru bamufitiye icyizere.

Ariko ntibizabe, ari cya kizere ,kiraza amasinde ! Bivugwa ko intambara ikomeye iri mu ishyaka rya PSD kuko ngo bo uwo mwanya barawuguze. Ngo hafi abakombozi bose bumva basimbura Dr Biruta kuri uwo mwanya nka Perezida wa Sena ; Dr. Ntakirutiryayo ngo kuba ari Visi-Perezida w’Abadepite ngo yumva akeneye kuzamurwa mu ntera akaba Perezida wa Sena nibura akajya yicara iruhanda rwa Paul Kagame. Ministre Kamanzi ngo nawe yumva yawushobora, nawe akegera Paul Kagame akamuganirizamu gihe bari mu biroro kuko arambiwe kumurungurukira kure mu gihe bari mu nama ya Kabineti (cabinet). Naho Muhongayire Jacqueline ngo kubera Gender nawe ngo ubushobozi burahari, abonye iyo ntebe yajya ayizengurutsaho ! Ariko hakaba n’abibaza ikosa Dr Lyambabaje yakoze rituma atabona uwo mwanya ? Ibi bibazo byose tuvuze ha r ugur u, bivugwa ko bizakemurwa na F.P.R. dore ko nayo agatoye, ise izajya ikemura n’ibibazo by’andi mashyaka ? Ahantu hadateye ikibazo ngo ngi muri P.D.C kuko ngo ba f a t a nka F.P.R. nk’umubyeyi. Ngo icyo izabagenera ntibazagaya, kuko ngo n’ubundi kubirabo nta muntu bafite warwanira kariya kanya !

Indi myanya 20 isigaye uyitanga arahari, abafite ifemba yayo ngo babe bashubije amerwe mu isaho. Bivugwa ko hafi ya bose biyamamariza ku itike ya F.P.R. ngo utarasomye ku masomo yayo akarenzaho Seyasa aba ategereje ubutarambirwa kuko n’abategereje umucunguzi yezu kristu batararambirwa, ngo igihe kiba kitaragera ngo azamurwe mu bushorishori !Ngo iyi myanya muri sena barimo kuyipanga uburyo izatangwa bitewe n,ubryo abanyamuryango bakorera cyama !

Iyi myanya 20 n’ubwo nta ntambara ihari yo kuyirwanira ngo ariko ikenewe n’abantu b’ingeri nyinshi.Barimo n’abaministre kuko ngo nabo bafite ubwoba bwinshi cyane kuko abasenateri nibamara gutorwa , Paul Kagame yazavugurura guverinema, bamwe bagatakaza imyanya dore ko mu tubari dukomeye, iyo banyakubahwa bamaze guhaga batangiye kumuhimbira ngo agiye gukora nka Tshunami. Uretse n’ibyo ngo nta mpamvu yo kudahindura guverinema kuko hafi ya ba Ministre bagiye kumaramo igihe kitari gito.Bakaba baranbiranye !

Murumva ko nintambara y’imyanya muri sena ari ikibazo, dore ko ugiyemo aba abonye ga r ant i yo k u t amb u r w a imb e h e keretse mu gihe apfuye cyangwa agatera akikiriza ibitandukanye n’ibya F.P.R. Abakeneye imyanya ya sena ngo ni uruvunganzoka, abenshi batangiye kwishyira mu myanya, ngo birwa batuka ba Kayumba na Karegeya babita ibigarasha ngo byumvikane ko badahuje umugambi wo kurwanya leta ko ahubbwo bari mu kwaha kwa F.P.R. Ari abinjiye kera mu muryango nkaba : Bihozagara, Mazimpaka barawushaka, Rucagu we ngo abarusha amahirwe n’ubutoni naho Mutsindashyaka yasubijwe mu bana ba F.P.R, ubwo nawe murumva ko ataviramo aho.

Ese Biruta ! azahabwa ikI ? Buriya wasanga gihari kandi nikitaboneka azajye gutera udushinge ibimunanira ajye guhinga amashaza za Shyorongi nkuko Muroma Habimana Bonaventure yahinze ibisheke amaze gusezererwa muri politiki.

Nyirubutagatifu Vedaste

Kayumba Nyamwasa na Agathon Rwasa mu gutera u Burundi

Amakuru agera ku kinyamakuru Umwezi aremeza ko ubu RNC ya Kayumba Nyamwasa, Karegeya, Gahima na Rudasingwa, imaze kuzenguruka ishaka abo bafatanya urugamba rwo guhirika ubutegetsi bwa Perezida Kagame, ubu akaba ageze muri FNL ya Agathon Rwasa.

Urugamba Kayumba Nyamwasa arwana yarutangiye ku mugaragaro kuwa 28 Gashyantare 2010 ubwo yahungaga igihugu. Aha hakoreshejwe ijambo ku mugaragaro kuko na mbere byagiye bigaragara ko urugamba rwo kurwanya ubutegetsi bwa Kagame, Kayumba yarutangiye kera aho yagiye yiyegereza ingabo buhoro buhoro, ibinyamakuru cyane cyane Umuseso, n’ubu hakaba hari ibimenyetso simusiga bigaragaza ko akorana na wo. Ikindi kandi, Ikinyamakuru Umuvugizi cyo cyareruye kireka kuba ikinyamakuru, ahubwo gihitamo kwibera itangazamakuru rikora poropagande y’agatsiko ka Kayumba.

Kayumba rero n’abo bafatanyije mu gushaka ingufu bahereye kuri FDLR, umutwe w’iterabwoba ukaba wiganjemo abakekwaho gukora Jenoside yakorewe Abatutsi muri Mata 1994. Begereye kandi FDU Inkingi, umutwe ugizwe ahanini na RDR na FDLR basinya amasezerano yo gufatanya; RNC kandi ubu ikorana na Paul Rusesabagina witwikiriye ijoro akigira intwari yarokoye Abatutsi yiyibagije uburyo yacuje abari bahungiye muri Hotel des Mille Collines, aho kuryama no kurya babanzaga kumuha amaturo.

Twibutse kandi ko yegereye umugabo Faustin Twagiramungu, uyu wariMinisitiri w’intebe, wamuteye utwatsi ngo kubera ko akorana n’agatsiko gashinjwa iterabwoba FDLR, ko rero atakorana na RNC.

Kayumba ntabwo yarekeye aho, yanegereye Umwami Kigeli V Ndahindurwa amusaba gufatanya na we, nyamara Umwami yamubasabye kugenda buhoro ndetse anamubwira ko umuvuduko RNC ifite ari nk’uw’imodoka igiye kugonga moteri.

Kayumba Nyamwasa wari wizeye ingufu mu baturage, yasanze yaribeshye cyane kuko amatora aherutse ya Perezida wa Repubulika, yamweretseko bari inyuma ya Perezida wabo aho bamutoye k’ubwiganze bw’amajwi arenga 90%. Icyizere cyo mu ngabo cyo bavuga ko atacyigeze dore ko abo afitanye na bo ibibazo ku giti cyabo ari umubare munini cyane.

I Chicago na ho yari yizeye ko abanyarwanda baba hanze na bo bamuri inyuma, naho rero byamubereye bibi cyane dore ko ngo n’abantu 20 ba RNC, abarenga icya kabiri cyabo byarangiye bisangiye Kagame n’abaturage be aho bari mu nama i Chicago basaba imbabazi ko bari bayobye kandi ngo barazihawe.

Kayumba kwa Agathon Rwasa

Iyo urebye usanga gufatanya na FDLR urugamba rwo guhirika ubutegetsi bw’u Rwanda bigoye kubera impamvu z’ingenzi ebyiri:

Iya mbere ni uko FDLR itizera Kayumba na RNC na gato kubera amateka, ikindi kandi bazi ko Kayumba gusaba gufatanya na bo ari amaburakindi kuko atabakunda.

Impamvu ya kabiri, Congo ubu ni igihugu abazungu bafitemo inyungu zifatika kandi bazi neza ko baramutse baretse Kayumba akajya kugishoramo intambara u Rwanda rwamusangayo bityo inyungu zabo zikabangamirwa. Na none kandi Kayumba azi neza ko ingabo z’u Rwanda kurwanira muri Congo byoroshye cyane kuko zihazi nk’uko umuntu aba azi inzu ye.

Aho ntiyibeshya!

Kayumba Nyamwasa guhitamo gufatanya na FNL ya Agathon Rwasa ngo asanga afatanyije nawe kuko ubu ari kumwe n’abandi banyapolitiki b’u Burundi aribo: Leonard Nyangoma akaba Perezida wa CNDD, Alex Sinduhije Perezida wa MSD, Pascaline Kampayano wari umukandida ku mwanya wa Perezida wa Repubulika atanzwe na UPD, Agathon Rwasa wa FNL, Pancrasse Cimpaye Umuvugizi w’ishyaka FRODEBU na Alice Nzomukunda wa ADR, uyu akaba asigaye aba i Bujunbura, akaba yaritandukanyije na bariya barwanya ubutegetsi bw’u Burundi.

Ngo Kayumba afatanyije na Agathon Rwasa bakabanza guhirika ubutegetsi bw’u Burundi bavuga ko bufite integer nke cyane ndetse budakunzwe n’abaturage, ngo byamufasha kukzabona aho ashinga ibirindiro kugira ngo atere u Rwanda, aturutse mu Burundi.

Ibi rero bishimangira ibikorwa bimaze iminsi bikorwa ku mupaka w’u Burundi na Congo aho bivugwa ko Agathon Rwasa ariho afite ibirindiro, bityo Kayumba akaba yaramusanze kugira ngo bafatanye urwo rugamba rwo kugira ngo bahirike ubutegetsi bwa Pierre Nkurunziza, nyuma bazakurikizeho Paul Kagame.

Ibi kubivuga biroroshye ariko kubikora ni ikindi. Twakomeje tuvuga ko n’iyo waba ufite intwaro zingana gute kandi ushyigikiwe n’ibihugu by’ibihangange, iyo udafite impamvu ifatika ituma urwana ntutsinda urugamba. Kayumba akwiye kumenya ko yibeshye agasaba imbabazi abanyarwanda.

Ntalindwa Théodore